Årets offentlege nettstader 2007

I samband med den årlege kvalitetsvurderinga delte Noreg.no og Kommunal Rapport ut fire prisar til offentlege nettstader som har utmerka seg positivt.

I kåringa har juryen lagt vekt på design, innhald, navigasjon, struktur, nyskaping og brukarmedverknad. Resultatet av kvalitetsvurderinga er ein del av vurderingsgrunnlaget, men juryen har hatt fagleg fridom, også til å nominere nettstader som ikkje er kvalitetsvurderte.

Årets statlege nettstad

Dei nominerte til prisen var:

• Statens forureiningstilsyn
• Ung.no
• Universitetet i Stavanger

Årets vinnar: Ung.no

Juryen si grunngjeving:

• Vinnaren av årets statlege nettstad tek brukarvennlegheit på alvor. Nettstaden er bevisst si målgruppe gjennom design og språk, og involverer brukaren i undersøkingar, spørsmål og debatt. Nettstaden er blitt betre på tilgjengelegheit, men juryen peiker på at vinnaren må jobbe vidare med bl.a. koding av tabellar og validering av kode. Med omsyn til navigasjon, tilbyr nettstaden fleire inngangar til informasjonsressursane, bl.a gjennom ei kreativ cloudsvising for tema. Vinnaren lukkast også i å ivareta folkeopplysarrolla, med fokus på målgruppa.

Årets kommunale nettstad

Dei nominerte til prisen var:

• Asker kommune
• Bergen kommune
• Trondheim kommune

Årets vinnar: Trondheim kommune

Juryen si grunngjeving:

• Vinnaren av årets kommunale nettstad skårar høgt i kvalitetsvurderinga frå Noreg.no. Nettstaden har ryddig design, er lett å navigere på og har konsistente menyar. Men juryen meiner at nettstaden har eit noko stort fokus på nyheiter og at desse tek for mykje plass på framsida. Nettstaden tilbyr ei rekkje elektroniske tenester for innbyggjaren, bl.a. videoverføring av debattar, og det er mogeleg å nettprate. På området nyttig innhald i kvalitetsvurderinga skårar vinnaren høgast av alle dei vurderte nettstadene.

Årets netteneste

Dei nominerte til prisen var:

• Statens lånekasse
• Statens Pensjonskasse
• Yr.no

Årets vinnar: Yr.no

Juryen si grunngjeving:

• Vinnaren av årets netteneste vender seg til eit stort publikum og har eit brukarvennleg grensesnitt som gjer det enkelt å finne fram. Nettstaden tilbyr fleire inngangar til informasjonen og nyttar web-teknologien godt. Men juryen meiner at det er unødvendig å presentere mange ulike lokalitetar, som til dømes kyrkje, bru, tunnel, for same geografiske stad. Vinnaren legg til rette for at andre nettstader kan bruke data i eigne tenester, noko som juryen meiner gjer nettstaden til eit førebilete for andre.

Tilgjengelegheitsprisen

Dei nominerte til prisen var:

• Dinfeil.no
• Dok.no
• Regjeringa.no

Årets vinnar: Dok.no

Juryen si grunngjeving:

• Årets vinnar utmerkar seg ved eit bevisst fokus på tilgjengelegheit, utover retningslinjene frå Noreg.no. Nettstaden har kode som validerer og bruker nøkkelord for å vise brukaren til relaterte artiklar. Juryen peiker på at nettstaden har eit litt kjedeleg design, noko som underbyggjer myten om at tilgjengelege nettstader = traust og kjedeleg. Juryen understrekar at vinnaren har gjort eit grundig arbeid med å gjere informasjon tilgjengeleg for ulike brukargrupper. Ved å tilby informasjon også som teiknspråk og i lettlest versjon er nettstaden i ein klasse for seg.

Jury

Årets jury bestod av:

• Aud Marie Hauge (Gazette)
• Haakon Aspelund (Deltasenteret)
• Thor Fredrik Eie (Netlife Research)
• Ole Pedersen (Kommunal Rapport)
• Trude Risnes (Noreg.no)
• Frank Fardal (Noreg.no)